一家七口800呎 90後:有自己房睇AV都方便啲
Keith從細到大,一直同父母、姊姊、姑姑、婆婆同埋一個傭人一齊居住。佢哋一家七口人住喺一個有800多平方呎嘅私人屋苑單位入面。表面睇落好大,但當分配俾每個人之後,每個人嘅空間都唔過百多平方呎。而且,房間唔夠:父母有一間、婆婆有一間、傭人有一間細小嘅工人房,而Keith同埋佢姑姑同姊姊就塞喺一間房裏。自細佢就有一個心願——想擁有自己嘅私人空間,即使只係一個細細嘅房間都好。「擁有自己嘅房間唔係一定會發生嘅事情,只係想有一個自己嘅空間,原來咁困難。」長大後嘅佢嘆息道。